சிறுவயதில் இருந்தே நெருங்கிய நண்பர்களாக இருந்து வருகிறார்கள் ஜெகவீர் மற்றும் மீனாட்சி. ஒரே பள்ளிக்கூடத்தில் படித்து அதற்கு பின் ஒரே கல்லூரியில் படித்து அதற்கு பிறகு ஒன்றாக சேர்ந்து ஒரு வெட்டிங் போட்டோகிராபி கம்பனியை தொடங்குகின்றனர். இவர்கள் எங்கு சென்றாலும் இவர்களை காதலர்கள் என கூறுகிறார்கள் ஆனால் இவர்கள் இருவருக்கும் இடையே நல்ல நட்பு மட்டுமே இருக்கிறது. இப்படி இருக்கும் சூழ்நிலையில் பவித்ரா என்பவரை ஜெகவீர் காதலிக்க தொடங்குகிறார். மீனாட்சியுடன் நெருங்கி பழகுவது அவருடன் நட்பு வைத்துக் கொள்வது என்பது பவித்ராவிற்கு பிடிக்கவில்லை. இதனால் ஜெகவீரை மீனாட்சியுடன் இருக்கும் நட்பை விட சொல்கிறார். ஆனால் ஜெகவீர் அதை செய்ய மறுக்கிறார். காதலுக்கும் நட்புக்கும் இடையே சிக்கித் தவிக்கிறார் ஜெகவீர். இதற்கு அடுத்து என்ன ஆனது? ஜெகவீர் காதல் ஒன்று சேர்ந்ததா? காதலா? நட்பா? என்பதே படத்தின் மீதிக்கதை.
அறிமுக நடிகர் ஜெகவீர், குழந்தைத்தனமான முகத்தோடும், குறையில்லாத நடிப்போடும் தனது கதாபாத்திரத்திற்கு நியாயம் சேர்த்திருக்கிறார். கதையின் நாயகனாக இருந்தாலும், தனக்கு எது வரும், அதை எப்படி செய்தால் எடுபடும், என்பதை சரியாக கணித்து நடித்து படத்திற்கு பலமாக பயணித்திருக்கிறார்.
நாயகியாக நடித்திருக்கும் மீனாட்சி கோவிந்தராஜனின் முகம் மட்டும் அல்ல நடிப்பும் படம் முழுவதும் பளிச்சிடுகிறது. குழப்பமான மனநிலையில் இருப்பவர்களை தெளிவுப்படுத்துபவர், தான் குழம்பிய நிலையில் இருக்கும் போது நண்பனின் பேச்சைக் கேட்டு நம்பிக்கையோடு பயணிக்கும் இடங்களில் அழுத்தமான நடிப்பு மூலம் பார்வையாளர்களை கவர்ந்துவிடுகிறார். புதுவரவு லத்திகா பாலமுருகனின் கதாபாத்திரமும், அதில் அவர் வெளிப்படுத்திய நடிப்பு மூலம் பார்வையாளர்கள் மனதில் நல்வரவாக பதிந்துவிடுகிறார்.
பால சரவணன், ஆண்டனி பாக்யராஜ், சிங்கம் புலி, வினோதினி, ஜெயப்பிரகாஷ் என மற்ற வேடங்களில் நடித்திருப்பவர்கள் தங்களது பணியை சரியாக செய்து திரைக்கதை ஓட்டத்திற்கு பலம் சேர்த்திருக்கிறார்கள். டி.இமான் இசையில் பாடல்கள் அனைத்தும் இதமாக பயணிக்கிறது. பின்னணி இசையும் அதிகமான சத்தமின்றி அளவாக பயணித்து கதைக்களத்திற்கு பலம் சேர்த்திருக்கிறது.
ஒளிப்பதிவாளர் வி.எஸ்.அனந்த கிருஷ்ணாவின் கேமரா, பிரமண்டமான ஆல்பம் பார்ப்பது போன்ற உணர்வை படம் முழுவதும் கொடுத்திருக்கிறது. பாடல்கள் மற்றும் வசனக் காட்சிகள் என அனைத்திலும் நட்சத்திரங்களை அழகாக காட்டியிருப்பதோடு, படம் முழுவதையும் அழகாக காட்சிப்படுத்தியிருக்கிறார்.
படத்தொகுப்பாளர் தியாகு.டி, காதலை காட்டிலும் கதையில் முக்கியத்துவம் பெறும் நட்பை கவிதையாக பார்வையாளர்கள் மனதில் பதியும் அளவுக்கு நேர்த்தியாக காட்சிகளை கோர்த்திருக்கிறார். ’புது வசந்தம்’ மூலம் ஆண், பெண் உறவில் புரட்ச்சியை ஏற்படுத்தி நட்புக்கு மரியாதை அளித்த தமிழ் சினிமாவில், மீண்டும் ஒரு நட்பு புரட்சியை ஏற்படுத்தியிருக்கிறார் இயக்குநர் சுசீந்திரன். ஆண், பெண் இடையிலான நட்பை கொண்டாடுவது தமிழ் சினிமாவில் புதிதல்ல என்றாலும், அவர்களது நட்பு எவ்வளவு ஆழமானது என்பதை எளிமையாகவும், மகிழ்ச்சியாகவும் பார்வையாளர்களிடத்தில் கடத்தியிருக்கும் இயக்குநர் சுசீந்திரன், அதை வசனங்கள் மூலம் விவரித்து போராடிக்காமல், காட்சிகள் மூலம் விவரித்து பார்வையாளர்களை கொண்டாட வைக்கிறார். திரைக்கதை மெதுவாக நகர்வது போல் சில இடங்களில் தோன்றினாலும், அந்த இடங்களில் நகைச்சுவையை தெளித்து பார்வையாளர்களை சிரிக்க வைப்பதோடு, பெண்கள் பற்றிய புரிதல் மற்றும் அதைச் சார்ந்த வசனங்கள், காதல் மற்றும் நட்பை வேறுபடுத்தி காட்டுவது ஆகியவற்றை காட்சிப்படுத்திய விதம், என படம் பார்வையாளர்களுக்கு புதிய அனுபவத்தை கொடுக்கிறது.
தலைப்பு முழுவதையும் காதல் ஆட்கொண்டு இருந்தாலும், திரைக்கதையில் பெற்றோர் மற்றும் நண்பர்களுக்கு முக்கியத்துவம் கொடுத்திருக்கும் இயக்குநர் சுசீந்திரன், குடும்பத்துடன் பார்க்க கூடிய ஒரு அழகான காதல் கதையாக மட்டும் இன்றி தற்போதைய காலக்கட்டத்து இளைஞர்களின் நட்புக்கு மரியாதை கொடுக்கும் படைப்பாகவும் கொடுத்திருக்கிறார்.
