விமல் நடிப்பில் ‘தேசிங்கு ராஜா’ திரைப்பட வெற்றியை தொடர்ந்து, 10 ஆண்டுகளுக்குப் பிறகு, இதன் 2-ம் பாகம் இன்று வெளியாகி இருக்கிறது. இப்படம் குறித்துக் காண்போம்..
போலீஸ் இன்ஸ்பெக்டர்களான விமலும், புகழும் (பெண்ணாக) தொழில் போட்டியால் அவ்வப்போது மோதிக்கொள்கிறார்கள். இதற்கிடையில் அமைச்சர் ரவி மரியாவின் மகன் கொல்லப்பட, போலீசாருடன் அவருக்கு பகை ஏற்படுகிறது. அதேவேளை கட்சியில் இருந்து ரவி மரியாவை நீக்க முடிவு எடுக்கிறார்கள். அப்போது சக அமைச்சர்களின் அந்தரங்க ரகசியங்கள் அடங்கிய சி.டி.யை வெளியிடுவேன் என்று ரவி மரியா மிரட்டுகிறார். இதற்கிடையில் வங்கியில் இருந்த அந்த சி.டி. திருட்டு போகிறது. அந்த சி.டி. திருட்டின் பின்னணியில் கொடூரமான கொள்ளையர்கள் இருப்பது தெரியவருகிறது. அந்த சி.டி. கைப்பற்றப்பட்டதா? அமைச்சரின் மகன் கொலைக்கான காரணம் என்ன? என்பதே மீதி கதை.
நாயகனாக நடித்திருக்கும் விமல், தனக்கு இருக்கும் கடனை அடைப்பதற்காக கதை கேட்காமல் வாய்ப்பு வந்தால் போதும் என்று நடித்து வருவது, இந்த படத்தை பார்த்தாலே தெரிகிறது. மற்றொரு நாயகனாக நடித்திருக்கும் ஜனா, நடனம், ஆக்ஷன் என அனைத்தும் தனக்கு தெரியும் என்பதை நிரூபித்திருக்கிறார். பூஜிதா பொன்னடா, ஹர்ஷிதா பண்ட்லமூரி, ஜூகி என மூன்று பேர் நாயகிகளாக நடித்திருக்கிறார்கள். மூவருக்கும் தலா ஒரு பாடல், சில காட்சிகள் கொடுக்கப்பட்டிருக்கிறது. மூவரும் கொடுத்த வேலையை குறையில்லாமல் செய்திருக்கிறார்கள். பெண் வேடம் போட்டு நடித்திருக்கும் புகழின் காட்சிகள் அனைத்தும் பார்வையாளர்களுக்கு சிரிப்புக்கு பதிலாக ஆத்திரம் வர வைக்கிறது.
அமைச்சராக நடித்திருக்கும் ரவி மரியா, முதலமைச்சராக நடித்திருக்கும் ஆர்.வி.உதயகுமார், சிங்கம்புலி, லொள்ளு சபா சுவாமிநாதன், கேபிஒய் வினோத், மதுரை முத்து என படத்தில் ஏகப்பட்ட நட்சத்திரங்கள் இருந்தாலும், ஜொலிக்கவில்லை. இசையமைப்பாளர் விதயாசாகரின் இசை, ஒளிப்பதிவாளர் செல்வா.ஆர்-ன் ஒளிப்பதிவு, படத்தொகுப்பாளர் ஆனந்த் லிங்க குமாரின் படத்தொகுப்பு என தொழில்நுட்ப கலைஞர்களின் பணி படத்தை அதர பழசாகவே காட்டியிருக்கிறது. எழுதி இயக்கியிருக்கும் எழில், நகைச்சுவை படம் என்ற பெயரில் பார்வையாளர்களின் ரசனையை குறைத்து மதிப்பிடும் அளவுக்கு ஒரு படத்தை கொடுத்திருக்கிறார்.
நகைச்சுவை படங்களில் லாஜிக் பார்க்க கூடாது, என்று சொல்வார்கள். ஆனால், இந்த படத்தில் நகைச்சுவைக் காட்சிகளையே எதிர்பார்க்க கூடாது. படம் முழுவதும் யார் யாரோ, எதை எதையோ பேசிக் கொண்டிருக்க, திடீரென்று ஒரு திருப்பம், என்று கதை எப்படியோ பயணித்து முடிகிறது.
