நிலத்தில் கடினமாக உழைக்கும் பாட்டாளியை, ‘நல்லபாடன்’ என்று சொல்வது கொங்கு வட்டார வழக்கம். வான்மழையை நம்பி சிறுநிலத்தில் உழுது வாழ்க்கை நடத்தும் நல்லபாடன் பரோட்டோ முருகேசன், கிணற்றில் விழுந்த தனது மகன் விஜயனின் உயிரைக் காப்பாற்ற வேண்டி, ஒண்டிமுனிக்கு ஒரு கிடாயை நேர்ந்து விடுகிறார். ஊரிலுள்ள 2 பண்ணையார்களின் ஈகோவால், பல வருடங்களாக ஒண்டிமுனிக்கு திருவிழா நடக்கவில்லை. கிடா வளர்கிறது. 50 ஏக்கர் கொண்ட பண்ணையார் கார்த்திகேசனிடம், ஊர் மக்களின் நீராதாரத்துக்காக குளம் வெட்ட அரசு 5 ஏக்கர் நிலம் கேட்கிறது. அதை கொடுக்க மறுக்கும் கார்த்திகேசன், சூழ்ச்சி வலை பின்னி, பரோட்டா முருகேசனை வைத்து, அங்குள்ளவர்களின் கைரேகையை வாங்கி, 5 ஏக்கர் நிலத்தை அபகரிக்கிறார். இந்நிலையில், திடீரென்று சமாதானம் அடைந்த 2 பண்ணையார்களும் ஒண்டிமுனிக்கு திருவிழா நடத்த கூடுகின்றனர். அப்போது எதிர்பாராத சம்பவம் நடக்கிறது. அது என்ன என்பது மீதி கதை.
நல்லபாடன் கதாபாத்திரத்தில் நடித்திருக்கும் பரோட்டா முருகேசன், ஏழை விவசாயியாக எதார்த்தமாக நடித்திருக்கிறார். செருப்பு கூட அணியாமல் காடு, மேடுகளில் நடமாடி இஷ்ட்டப்பட்டு கஷ்ட்டப்பட்டு நடித்து தனது கதாபாத்திரத்திற்கு உயிரூட்டியிருக்கிறார். பல படங்களில் சிறு சிறு வேடங்களில் நடித்து வரும் பரோட்ட முருகேசனுக்கு இந்த படம் நிச்சயம் மிகப்பெரிய அங்கீகாரத்தோடு, பல விருதுகளையும் பெற்றுத்தரும். பெரிய பன்னாடியாக நடித்திருக்கும் கார்த்திகேசன், சிறிய பன்னாடியாக நடித்திருக்கும் முருகன் இருவரும் நடிப்பில் அசத்தியிருப்பதோடு, தங்களது கதாபாத்திரங்களின் மனநிலையை நடிப்பு மூலம் அபாரமாக வெளிக்காட்டியிருக்கிறார்கள். பரோட்டா முருகேசனின் மகனாக நடித்திருக்கும் விஜயன், மகளாக நடித்திருக்கும் சித்ரா நடராஜன், மாப்பிள்ளையாக நடித்திருக்கும் விஜய் சேனாதிபதி, பேரனாக நடித்திருக்கும் சிறுவன், விகடன், என மற்ற கதாபாத்திரங்களில் நடித்திருப்பவர்கள் கதாபாத்திரங்களுக்கு பொருத்தமான தேர்வு.
பாடல்கள் இல்லை என்றாலும் பின்னணி இசை மூலமாகவே தன்னை தனித்து காட்டி வியக்க வைத்திருக்கிறார் இசையமைப்பாளர் நடராஜன் சங்கரன். ஒளிப்பதிவாளர் விமல், தனது கேமரா மூலம் கதைக் களத்தையும், கதை மாந்தர்களையும், அவர்களது வாழ்வியலையும் நம் கண்முன் நிறுத்தியிருக்கிறார். சாதாரண கதையாக இருந்தாலும், அதை சுவாரஸ்யமாக சொல்லும் இயக்குநரின் திரைக்கதைக்கு கூடுதல் சுவாரஸ்யம் சேர்க்கும் வகையில் காட்சிகளை தொகுத்திருக்கிறார் படத்தொகுப்பாளர் சதீஷ் குரசோவா. எழுதி இயக்கியிருக்கும் சுகவனம், ஒரு சாதாரண கதைக்கருவை, திரைக்கதை மூலம் சுவாரஸ்யமான திரைப்படமாக மட்டும் இன்றி, ஒரு மண்ணின் வாழ்வியலை சிறப்பான படைப்பாகவும் கொண்டு வந்திருக்கிறார். கதைக்களம் மற்றும் கதாபாத்திரங்களை கையாண்ட விதம் என படம் முழுவதும் பாராட்டு பெறும் இயக்குநர் சுகவனம், எதிர்பார்க்காத கிளைமாக்ஸ் மூலம் வியக்க வைத்து விட்டார்.
